(ខេត្តកំពង់ធំ)៖ ថ្ងៃទី១០ ខែកក្កដា ឆ្នាំ២០២៦ លោកឧត្តមសេនីយ៍ទោ ហេង សុផល ស្នងការ នៃស្នងការដ្ឋាននគរបាលខេត្តកំពង់ធំ បានដឹកនាំកងកម្លាំងចុះសាកសួរសុខទុក្ខមន្ត្រីប៉ុស្តិ៍នគរបាលរដ្ឋបាល ដែលកំពុងប្រចាំការ ផ្ដល់សេវាសាធារណៈ ជូនប្រជាពលរដ្ឋ ស្ថិតនៅស្រុកកំពង់ស្វាយ និងស្រុកប្រាសាទបល្ល័ង្ក។
ជាកិច្ចចាប់ផ្ដើមលោកឧត្តមសេនីយ៍ទោ ហេង សុផល
បានពាំនាំនូវប្រសាសន៍ ផ្ដាំផ្ញើសាកសួរសុខទុក្ខសំណាក់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម នួន ផារ័ត្ន អភិបាល នៃគណៈអភិបាលខេត្ត ជូនចំពោះបងប្អូនកងកម្លាំងនគរបាលប៉ុស្តិ៍រដ្ឋបាល ដែលកំពុង
តែបំពេញភារកិច្ច យ៉ាងសស្រាក់សស្រាំ ប្រកបដោយស្មារតី ទទួលខុសត្រូវ តាមបណ្តាអង្គភាពរបស់ខ្លួន លើការងារបម្រើសេវាសាធារណៈ និងកិច្ចប្រតិបត្តិការ ថែរក្សា សន្តិសុខ សុវត្ថិភាព សណ្តាប់ធ្នាប់សង្គម។
ក្នុងពិធីនោះលោកស្នងការខេត្តកំពង់ធំ បានកោតសរសើរ ដល់ថ្នាក់ដឹកនាំ និងកម្លាំងប៉ុស្តិ៍នគរបាលរដ្ឋបាល ដែលមានឯកភាព សាមគ្គីភាព ឈានទៅសម្រេច បាននូវសមិទ្ធផលនានា ជាបន្តបន្ទាប់ ក្នុងអង្គភាព ឱ្យទទួលបានភាពស្រស់បំព្រង រីកចម្រើនគួរជាទីមោទនៈ។
ដើម្បីធានាបាន និរន្តរភាពការងារ លោកឧត្តមសេនីយ៍ទោស្នងការខេត្តកំពង់ធំ បានក្រើនរំលឹក និងដាក់ចេញទិសដៅ ៧ចំណុច ដល់កម្លាំងអនុវត្តឱ្យទទួលបានប្រសិទ្ធភាពខ្ពស់៖
ទី១-ពង្រឹងបទវិន័យលេខ៨៧៣ របស់កម្លាំងនគរបាលជាតិ។
ទី២-ពង្រឹងរបបកិច្ចប្រជុំ តាមការកំណត់។
ទី៣-រៀបចំផែនការសកម្មភាព សម្រាប់អនុវត្ត តួនាទី ភារកិច្ចជាប្រចាំថ្ងៃ (ការផ្ដល់សេវារដ្ឋបាល ជូនប្រជាពលរដ្ឋ ដូចជា សៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណសញ្ជាតិខ្មែរ)។
ទី៤-ការងារស្ថិតិប្រជាពលរដ្ឋ គ្រប់គ្រងត្រួតពិនិត្យ ធ្វើបច្ចុប្បន្នភាពប្រជាជន ចំណូលចំណាកស្រុក ជាពិសេសការងារគ្រប់គ្រងសន្តិសុខតាមទីតាំង រស់នៅប្រមូលផ្តុំ ឱ្យសកម្មនូវយុទ្ធនាការបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ក្នុងភូមិសាស្ត្រ ទទួលខុសត្រូវរបស់ខ្លួន។
ទី៥-បង្កើនការងារសាមគ្គីភាព និងកិច្ចសហការល្អ ជាមួយមន្ត្រីរាជការ អាជ្ញាធរ មហាជនគ្រប់
ស្រទាប់វណ្ណ:។
ទី៦-បង្កើនការងារផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព តាមគោលដៅងាយរងគ្រោះ។
ទី៧-ការអនុវត្តលើការងារនគរបាល និងសហគមន៍ ត្រូវទំនាក់ទំនងយ៉ាងជិតស្និទ្ធក្នុងការចុះជួបអ្នកពាក់ព័ន្ធ មេភូមិ ឃុំ ចៅសង្កាត់ និងក្រុមប្រឹក្សាឃុំ-សង្កាត់ ព្រមទាំងបងប្អូនប្រជាពលរដ្ឋ រៀងរាល់ខែ ដោយធ្វើផែនការចុះផ្សព្វផ្សាយខ្លឹមសារ នៅតាមគោលដៅដែលបានកំណត់៕
ប្រភព៖ ស្នងការដ្ឋាននគរបាលខេត្តកំពង់ធំ
