បង្ក្រាបទីតាំងសង្ស័យពាក់ព័ន្ធ Online Scams ឃាត់ខ្លួនមនុស្សជាង ១០នាក់ វត្ថុតាងត្រូវជនសង្ស័យបោះចូលស្រះទឹក!
(ភ្នំពេញ)៖ នៅរសៀលថ្ងៃទី៥ ខែមិថុនា ឆ្នាំ២០២៦ កម្លាំងគណៈបញ្ជាការឯកភាពខណ្ឌពោធិ៍សែនជ័យ ដោយមានការចូលរួមពីនគរបាល អាវុធហត្ថ និងអាជ្ញាធរមូលដ្ឋាន បានចុះបង្ក្រាបបទល្មើស Online Scams ក្នុងទីតាំងផ្ទះមួយកន្លែង នៅភូមិព្រៃសាលា សង្កាត់កាកាបទី២ ដោយឃាត់ជនល្មើសជាង១០នាក់ មានទាំងចិន និងវៀតណាមផងដែរ។
ប្រតិបត្តិការនេះ បានធ្វើឡើងក្រោមការបញ្ជាផ្ទាល់ពីឯកឧត្តម ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ, លោកឧត្តមសេនីយ៍ឯក ជួន ណារិន្ទ អគ្គស្នងការរងនគបាលជាតិ និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការអាវុធហត្ថរាជធានីភ្នំពេញ ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ។
លោក សក់ កញ្ញារិទ្ធ អភិបាលខណ្ឌពោធិ៍សែនជ័យ ដែលកំពុងដឹកនាំកម្លាំងចុះបង្ក្រាបបទល្មើសមួយនេះ បានប្រាប់បណ្តាញព័ត៌មានផ្សព្វផ្សាយថា កម្លាំងគណៈបញ្ជាការឯកភាពខណ្ឌកំពុងប្រតិបត្តិការ ដោយឃាត់ខ្លួនមនុស្សជាង១០នាក់ និងដកហូតសម្ភារមួយចំនួន។
លោកអភិបាលខណ្ឌ បានបន្តថា ក្រុមជនល្មើសបានយកសម្ភារទាំងនោះ មានកុំព្យូរទ័របោះចូលទឹកស្រះ ចង់បំបាត់ភស្តុតាង តែកម្លាំងរបស់យើងបានដឹង និងបានស្រង់ចេញពីទឹកវិញអស់ហើយ។ នៅពេលនេះ សម្រាប់ក្រុមជនល្មើស និងវត្ថុតាង កម្លាំងជំនាញកំពុងបន្តនីតិវិធី ដើម្បីចាត់ការបន្តទៀត៕
